A Asociación Coruñesa de Esclerose Múltiple (ACEM) realizou un Programa de acollida e información a persoas con Esclerose múltiple e familiares, co que un 20 de persoas afectadas de EM e os seus familiares da provincia da Coruña recibiron durante os meses de xaneiro a xuño apoio psicolóxico para o afrontamiento da enfermidade e novas situacións que poidan ir xurdindo por mor desta.

Mediante este programa, persoas afectadas de EM recibiron sesións de terapia psicolóxica individual co obxectivo de acompañar a estes usuarios durante o proceso de aceptación e adaptación á enfermidade, proporcionándolles recursos para afrontar os cambios emocionais e físicos que conleva, mellorar o estado de ánimo e aprender a manexar o estrés e a ansiedade que pode supoñer o proceso variante e impredicible da enfermidade. Este apoio psicolóxico tamén permitiu un espazo para o desafogo e a expresión emocional, o fortalecemento da autoestima e a autonomía persoal, o que impacta positivamente na calidade de vida das persoas afectadas e os seus familiares.

Este proxecto forma parte do Plan de Prioridades da Confederación Española de Persoas con Discapacidade Física e Orgánica (COCEMFE), financiado pola Fundación ONCE. A Confederación xestiona esta subvención para o financiamento dos proxectos prioritarios das súas entidades, proporcionándolles asesoramento e realizando un seguimento pormenorizado durante todo o proceso.

A Asociación Coruñesa de Esclerose Múltiple – ACEM é unha entidade sen ánimo de lucro que agrupa a persoas con esclerose múltiple e aos seus familiares. O ámbito de actuación abarca todo o territorio da provincia da Coruña e nela promóvense toda clase de actividades e información destinadas a mellorar a situación e calidade de vida das persoas afectadas por esta enfermidade.